(А.Хәкимҗанов тексты, Айзилә Вахитова көе)
Ара тагын ерак
Ике арада безнең
Йолдызлар тузаны,
Сызгырган ачы җил.
Ишетсә йөрәгең -
Җый да син хисләрне,
Моң булып сарылып,
Әйдә кил.
Кушымта:
Көтәмен,
Күкләрдә йолдызлар атыла -
Теләгем һичшиксез тормышка ашачак.
Беләм бит кайтасың.
Ә моңсу хисләрем
Таң белән офыкка качачак.
Сискәнде ярадан,
Чакрымнар арасын
Яшь каен тәрәзә төбендә.
Күңелне юатып
Кочаклый-кочаклый
Кулларын куйгандай
Иңемә.
Кушымта.
Ә җаным көтәдер
Син киткән яклардан
Бер хәбәр назыңа төренгән.
Иртәнге чыклардай
Коела яшь булып
Сагыну хисләре күңелдә.
