Әллә микән төнем төштә,
Әллә микән өнемдә
Бер кыз күрдем, чибәр бер кыз
Күңелемнең күгендә..
Тарала дулкын чәчләре,
Назлы җилләр иркенә,
Сөрмәле керфекләреннән
Көлтә нурлар сирпелә..
Ярым айдай кыйгач-кыйгач
Кашларыңның карасы,
Сөйләүләрең - сандугачның
Сайрап туймас баласы..
Сылу сынга карыйсы да
Өннәремнән язасы,
Бу соклану моң тудырып
Сине җырга саласы..
Төшме, өнме , син, кал инде
Күңелем күкләрендә,
Төшме, өнме, син, кал инде
Моң булып күкрәгемдә..
Табылдың инде, югалма,
Яшә син серләремдә,
Минем бәхеткәем булып
Чынбарлык илләремдә..
